I pari i shtetit, Hashim Thaçi ka vazhduar polemikën me Bashkimin Evropian rreth çështjes së emërimit të Miroslav Lajçak si emisar për dialogun Kosovë-Serbi.

Presidenti këtë herë ka thënë se e mirëpret që BE-ja t’ia dëshmojë se është gabim rreth çështjes së emërimit të Lajçak si Përfaqësues Special për dialogun, derisa shton se mosemërimi i tij në atë post do të ishte në interes të Kosovës, raporton lajmi.net.

Duke mos e emëruar Lajçakun në pozitën e emisarit për negociatat Kosovë-Serbi, Bashkimi Evropian do të përmirësonte edhe kredibilitetin, thotë mes tjerash Thaçi, duke ja kujtuar se Sllovakia nuk e ka njohur Kosovën si shtet dhe votën kundër Kosovës në UNESCO.

“E mirëpres që BE-ja ta dëshmojë që jam gabim për emërimin e Lajçakut si i dërguar special për dialogun. Kjo do të ishte në interes të Kosovës dhe do ta përmirësonte kredibilitetin e BE-së. Argumenti im nuk lidhet me procedura të brendshme, por me gabimet strategjike. Sllovakia nuk e ka njohur Kosovën dhe ka votuar kundër nesh në UNESCO”, ka shkruar Thaçi.

I welcome EU proving me wrong on my claim about Lajcak’s appointment as SE. That'd be in Kosovo’s interest & improve EU’s credibility. My argument isn't related to internal procedures, but rather strategic mistakes. Slovakia hasn't recognized Kosovo & voted against us in UNESCO

— Hashim Thaçi (@HashimThaciRKS) March 21, 2020

Ndryshe, Zëdhënësi i shefit të BE-së për Politikë të Jashtme dhe Siguri, Joseph Borell, Peter Stano i ka reaguar presidentit të Kosovës lidhur me deklaratën e tij për Mirosllav Lajçak i përfolur se do të jetë në krye të dialogut Kosovë – Serbi.

“Jemi të befasuar të shohim një deklaratë të tillë të pasaktë dhe faktikisht jo-korrekte, procedurat e BE-së janë duke vazhduar, asnjë vendim nuk është marrë, nuk është bërë asnjë emërim ose as nuk është njoftuar. Pasi të përfundojë procesi, do të njoftojmë zyrtarisht Ministrinë e Punëve të Jashtme të Kosovës”, thotë Stano.